བཀའ་ཟུར་བློ་བཟང་སྙན་གྲགས་ལགས་ནས་བོད་རིགས་ཆིག་ཁྲི་ཐམ་པ་ནུབ་ཕྱོགས་རྒྱལ་ཁབ་ཁག་ཏུ་གནས་སྤོ་བྱ་རྒྱུའི་སྲིད་བྱུས།

སྲིད་བྱུས་འདི་ཉིད་གསལ་བསྒྲགས་བྱེད་དགོས་པའི་རྒྱབ་ལྗོངས་རྒྱུ་མཚན་བཞི།

༡། དེང་དུས་ཕྱི་རྒྱལ་གནས་སྤོའི་ཐད་ཀྱི་སྤྱི་ཚོགས་འགྱུར་འགྲོས་དང་མཐུན་པ།

ང་ཚོ་བཙན་བྱོལ་བོད་མིའི་མི་འབོར་གྱི་བརྒྱ་ཆ་༤༥ ཙམ་ད་ཆ་ནུབ་ཕྱོགས་རྒྱལ་ཁབ་འདྲ་མིན་ནང་གནས་སྡོད་བྱེད་བཞིན་ཡོད།

དེའི་ཁོངས་ནས་རང་རིགས་བརྒྱ་ཆ་༨༠ ཙམ་ནི་གཞུང་འབྲེལ་ལས་རིམ་འོག་མ་ཡིན་པར་སོ་སོས་སྒེར་ངོས་ནས་ཕེབས་པ་ཞེ་ཅིག་རེད། ཁོང་རྣམས་ནི་ཕྱི་རྒྱལ་ཕེབས་པའི་བརྒྱུད་རིམ་ནང་དངུལ་དང་དཔལ་འབྱོར་མཐུན་རྐྱེན་ལྡང་མིན་དང་། བཟའ་ཟླ་ཕ་མ་བུ་ཕྲུག་དང་ཡུན་རིང་བྲལ་བ། དེ་བཞིན་ནུབ་ཕྱོགས་ཡུན་ལུང་སོ་སོར་འབྱོར་མཚམས་ཁྲིམས་མཐུན་སྐྱབས་བཅོལ་དང་མེ་སེར་ཡིག་ཆ་དུས་ཐོག་ཐོབ་མིན་སོགས་དཀའ་ངལ་སྣ་ཚོགས་ཕྲད་དང་ཕྲད་མུས་རེད། འདས་པའི་བཅུ་ཕྲག་འགའི་རིང་གི་བོད་རིགས་ཕྱི་རྒྱལ་གནས་སྤོས་ཀྱི་གྲངས་འབོར་དང་འགྱུར་འགྲོས་ལ་གཞིགས་ན་མ་འོངས་པར་བོད་མི་རྣམས་ཕྱི་རྒྱལ་ཁག་ཏུ་རང་གཞུང་གིས་རྒྱབ་སྐྱོར་ཡོད་མིན་ལ་མ་ལྟོས་པར་གནས་སྤོ་བྱ་རྒྱུ་ཡིན་པ་ངེས་ཤིང་། སྤྱི་ཚོགས་ཀྱི་འགྱུར་འགྲོས་འདི་དང་བསྟུན་ནས་འགྲོ་ཐུབ་ན་བོད་མི་གནས་སྤོས་བྱེད་མི་རྣམས་ལའང་ཡུལ་ལུང་སོ་སོར་ཁྲིམས་མཐུན་སྐྱབས་བཅོལ་དང་མེ་སེར་དེབ་སྐྱེལ་འཐོབ་ཐབས་བྱ་རྒྱུ་ཕན་ཐོག་ཆེན་པོ་ཡོད།

༢། བོད་མིའི་སྤྱི་ཚོགས་ཡར་རྒྱས་ལ་སྨན་པ།

གནས་སྤོའི་ལས་འཆར་འདིའི་བརྒྱུད་བོད་རིགས་རྣམས་ཕྱི་རྒྱལ་ཡུལ་ལུང་སོ་སོར་རང་ཁ་རང་འཚོ་དང་རྒྱུན་སྲིང་ཐུབ་པའི་འཚོ་བ་གསར་དུ་བསྐྲུན་ཐུབ་རྒྱུ་ཙམ་མ་ཟད། བོད་རིགས་ཕྲུག་གུ་གཞོན་སྐྱེས་རྣམས་ལ་སློབ་གྲྭ་དྲག་རིམ་ནང་འཛུལ་ཞུགས་དང་། བསླབ་པའི་མཐར་སོན་མཚམས་སུ་ཤེས་ཡོན་དང་། ལག་ཤེས། ཁྱད་ལས་བརྩོན་འདོན་བྱས་ཞིང་འགྲན་བསྡུར་རང་བཞིན་ཅན་གྱི་ཚན་རྩལ་གྱི་ལས་རིགས་ནང་ཆ་ཤེས་ལེན་ཐུབ་པར་ཕན་ཐོག་ཡོང་རྒྱུར་ངེས་པ་ཡིན། འདས་པའི་ལོ་ངོ་བཅུ་ཕྲག་འགའི་ཉམས་མྱོང་ནང་ང་ཚོ་བོད་རིགས་རྣམས་ནུབ་ཕྱོགས་ཡུལ་གྲུ་འདྲ་མིན་ནང་འཚོ་ཐབས་གསར་པ་སྐྱེལ་ཐོག་རང་གི་ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སོར་ཆུད་ཡོང་ཐབས་ལ་འབད་བརྩོལ་གནང་པ་ལ་གཞིགས་ན། མ་འོངས་པར་བོད་རིགས་གནས་སྤོས་བྱུང་ན་འདི་ལས་ལོག་པ་ཞིག་མི་འོང་བ་ཡིད་ཆེས་དང་རེ་འདུན་བྱ་འོས་པ་ཞིག་རེད།

༣། བོད་ཀྱི་རྩ་དོན་ལ་ཕན་འབྲས།

བོད་རིགས་རྣམས་ཡར་ཐོན་ཅན་གྱི་རྒྱལ་ཁབ་འདྲ་མིན་གྱི་མི་སེར་ཞིག་ཏུ་གྱུར་མཚམས་སུ་རང་གི་གཞི་རྩའི་ཐོབ་ཐང་དང་རང་དབང་ལོངས་སུ་སྤྱད་དེ་གནས་ཡུལ་སྤྱི་ཚོགས་དང་རྒྱལ་ཁབ་ཀྱི་ཆབ་སྲིད་ལས་རིམ་ནང་ཆ་ཤས་ལེན་པ་དང་། ཞུ་གཏུག་བྱེད་པ། རྒྱབ་སྐྱོར་འཚོིལ་བ་སོགས་ཀྱི་བརྒྱུད་བོད་རྒྱ་འབྲེལ་མོལ་སོགས་ལ་རྒྱབ་སྐྱོར་འཐོབ་ཐབས་བྱེད་ཐུབ། དེ་བཞིན་ས་གནས་དང་། མངའ་སྡེ་འཐུས་མི་རྣམ་པའི་བརྒྱུད་བོད་ནང་གི་འགྲོ་བ་མིའི་ཐོབ་ཐང་དང་། རང་དབང་སོགས་གནད་དོན་རྫ་དྲག་རིགས་ལ་དོན་ཕན་ལྡན་པའི་རྒྱབ་སྐྱོར་འཐོབ་ཐུབ་པ་ཡིན། བོད་མི་ན་གཞོན་རྣམས་རྒྱལ་ཁབ་དང་མངའ་ཁུལ་སོ་སོའི་འགོ་ཁྲིད་འཐུས་མི་རྣམས་པའི་ལས་ཁུངས་ནང་ལས་རིགས་ཉམས་མྱོང་གིས་ཕྱུག་པར་བྱས་ཏེ་བོད་ཀྱི་དཀའ་ངལ་སེལ་ཆེད་ནུས་པ་འཐོན་པའི་ཕྱག་ལས་གནང་ཐུབ།

༤། བོད་མིའི་སྤྱི་ཚོགས་ཡར་རྒྱས་ལ་སྨན་པ།

ནུབ་ཕྱོགས་གནས་སྤོའི་ལས་རིམ་འདིའི་བརྒྱུད་ང་ཚོས་རྒྱ་གར་དང་བལ་ཡུལ་གནས་སྡོད་བོད་རིགས་རྣམས་ཀྱི་དཀའ་ངལ་ཕྲན་བུ་སེལ་ཐུབ་རྒྱུར་ངེས་པ་ཡིན། འདས་པའི་ལོ་ངོ་བཅུ་ཕྲག་འགའི་ནང་ང་ཚོས་གཞུང་མང་མཉམ་ལས་ཀྱིས་སྤྱི་ཚོགས་དང་དཔལ་འབྱོར་ཡར་རྒྱས་གང་ལ་གང་འཚམས་ཞིག་སྐྲུན་ཐུབ་པ་བྱུང་ཡོད། འོན་ཀྱང་ད་དུང་ཡང་ང་ཚོའི་རང་རེ་སྤུན་ཟླ་ཁག་གཅིག་ཕྱི་ནང་དོན་རྐྱེན་གྱིས་དབུལ་ཕོངས་ཀྱི་དཀའ་ངལ་མྱོང་བཞིན་པ་དངོས་འབྲེལ་རེད། དམིགས་བསལ་བལ་ཡུལ་ནང་སྐྱབས་བཅོལ་བོད་མི་རྣམས་ལ་ཡིག་ཆ་མེད་པའི་རྐྱེན་གྱིས་སློབ་སྦྱོང་དང་། ལས་ཀ། ཚོང་ལས་གོ་སྐབས་སོགས་མ་ཐོབ་པའི་དཀའ་ངལ་མང་དག་ཞིག་འཕྲད་བཞིན་ཡོད་པ་དེ་དག་གནས་སྤོའི་ལས་གཞི་འདི་ཐོག་ནས་རིམ་གྱིས་སེལ་ཐུབ་རྒྱུ་ཡིན།

བཀའ་ཟུར་བློ་བཟང་སྙན་གྲགས་ལགས་ཀྱི་བོད་རྒྱའི་ཞི་མོལ་ཐབས་བྱུས་འཆར་གཞི།

ཕྱི་ལོ་༢༠༢༠ ཟླ་༡༡ ཚེས་༡༤ ཨ་རི་ནིའུ་ཡོཀ་གྲོང་ཁྱེར་ས་གནས་ཚོགས་འདུ་ཞིག་གི་ཐོག་བཀའ་ཟུར་བློ་བཟང་སྙན་གྲགས་ལགས་ནས་བོད་རྒྱའི་དཀའ་རྙོག་དེ་ཉིད་ཞི་མོལ་གྱིས་ལམ་ནས་སེལ་རྒྱུ་དེ་ཁོང་གི་ཆབ་སྲིད་ཀྱི་དམིགས་ཡུལ་གཙོ་བོར་ངོས་འཛིན་གནང་བ་དང་འབྲེལ་ཐབས་བྱུས་གསལ་བསྒྲགས་གནང་སོང། ཁོང་ནས་རང་གི་ཆབ་སྲིད་ལས་ཡུན་ནང་བོད་རྒྱ་འབྲེལ་ལམ་བསྐྱར་གསོ་མ་ཐུབ་ཚེ་ཕྱི་ལོ་༢༠༢༦ གི་སྲིད་སྐྱོང་འོས་བསྡུའི་ནང་འཛུལ་ཞུགས་བྱེད་རྒྱུ་མིན་ཞེས་གསུངས་སོང་།
༡༽ ཉིན་དང་པོ་བརྒྱའི་ནང་བོད་རྒྱ་ཞི་མོལ་ཚོགས་ཆུང་སྲ་བརྟན་དུ་གཏང་རྒྱུ། 

• ཞི་མོལ་ཚོགས་ཆུང་གི་ཚོགས་མིའི་གྲུབ་ཆ་དང་།་ཚོགས་མི་སོ་སོའི་ལས་འགན་བསྐྱར་ཞིབ་དང་བསྒྱུར་བཅོས་གཏང་རྒྱུ།
• ཞི་མོལ་ཚོགས་དྲུང་ལས་ཁང་རྒྱ་བསྐྱེད་གཏང་རྒྱུ།
• ཆབ་སྲིད་ལྟ་གྲུབ་འདྲ་མིན་འཛིན་པའི་འཐུས་ཚབ་རྣམ་པ་དང་། རྒྱལ་སྤྱིའི་ཆབ་སྲིད་དང་ཁྲིམས་དོན་མཁས་དབང་ལས་གྲུབ་པའི་སློབ་སྟོན་ཚོགས་ཆུང་ཞིག་ཆེད་འཛུགས་བྱ་རྒྱུ།
• ཞི་མོལ་ཚོགས་ཆུང་གི་ཚོགས་མི་རྣམ་པར་རྒྱལ་འབྲེལ་སྲིད་བྱུས་དང་། གྲོས་མོལ། སྡུམ་སྒྲིག་བཅས་ཀྱི་ཐོག་ཁྱད་ལས་དང་འབྲེལ་བའི་ཟབ་སྦྱོང་གོ་སྒྲིག་བྱ་རྒྱུ།
༢༽ རྒྱལ་སྤྱིའི་རྒྱབ་སྐྱོར།
• མཐུན་ཕྱོགས་རྒྱལ་ཁབ་དང་འབྲེལ་ལམ་གསར་འཛུགས་བྱ་རྒྱུ།
• བོད་རྒྱ་ཞི་མོལ་ཐོག་རྒྱབ་སྐྱོར་གསལ་འདོན་བྱས་པའི་རྒྱལ་ཁབ་ཁག་གི་གྲོས་ཚོགས་གི་རྒྱབ་སྐྱོར་དང་། བགྲོས་ཆོད་འཐོབ་ཐབས་བྱ་རྒྱུ།
• བོད་ཀྱི་དཀའ་ངལ་འདི་ཉིད་རྫ་དྲག་གི་གནས་སྟངས་ཞིག་ཏུ་ཡོད་པ་མངོན་གསལ་ཐུབ་ཐབས་དང་། དེར་རྒྱབ་སྐྱོར་འཐོབ་ཐབས་ལ་ཨ་རི་ཝ་ཤིང་ཊོན་ཌི་སི་རུ་”བོད་སྐྱོབས་”སམ་”སེཝ་ཊི་བྷེཊ་”ཞེས་པའི་མི་མང་གི་ལས་འགུལ་ཆེན་པོ་ཞིག་བསྐོང་ཚོགས་ཞུ་རྒྱུ།
• མ་འོངས་བོད་ཀྱི་མདུན་ལམ་ཞེས་པའི་རྒྱལ་སྤྱིའི་ཚོགས་ཆེན་ཞིག་གོ་སྒྲིག་བྱ་རྒྱུ།
• ནང་པའི་སྤྱི་ཚོགས་དང་འདུས་སྡེ་ཁག་ནས་བོད་དོན་ཐོག་རྒྱབ་སྐྱོར་འཐོབ་ཐབས་དང་། སྤྱི་ཚོགས་དང་འདུས་སྡེ་དེ་དག་ཕན་ཚུན་བོད་དོན་ལས་གུལ་ཐོག་མཉམ་ལས་ཐུབ་པར་རྒྱལ་སྤྱིའི་ནང་པའི་ཚོགས་ཆེན་ཞིག་བསྐོང་ཚོགས་ཞུ་རྒྱུ།

༣༽ རྒྱལ་སྤྱི་ཚོགས་པ་ཁག་དང་། རྒྱལ་ཁབ་ཁག་བཅས་ལ་རྒྱལ་འབྲེལ་སྲིད་བྱུས་ཐབས་ལམ་འདྲ་མིན་བརྒྱུད་རྒྱ་ནག་དང་འབྲེལ་བ་སླར་གསོ་ཐུབ་ཐབས་དང་། བོད་རྒྱ་ཞི་མོལ་ཡོང་ཐབས་བཅས་བྱ་རྒྱུ།

བོད་མིའི་ཚོང་ལས་དང་གཞིས་ཆགས་སྲ་བརྟན།

བཀའ་ཟུར་བློ་བཟང་སྙན་གྲགས་ལགས་ཀྱི་ཚོང་ལས་སྔར་མེད་གསར་སྐྲུན་དང་ད་ཡོད་ཡར་རྒྱས་བརྒྱུད་བོད་མིའི་འཚོ་ཐབས་གོང་འཕེལ་ཡོང་ཐབས་ཀྱི་འཆར་གཞི། 

1

༡། འབྱུང་འགྱུར་ལོ་ལྔ་དང་བཅུའི་ནང་བོད་མིའི་དགུན་ཁའི་བལ་རིགས་སུ་ཊར་ཚོང་ལས་ཀྱི་མ་འོངས་གནས་བབ་དང་། རྒྱུན་གནས་ཇི་ཐུབ་ཐད་ཉམས་ཞིབ་བྱ་རྒྱུ། དུས་ཡུན་དེའི་ནང་བོད་རིགས་བལ་ཚོང་བ་རྣམས་ནས་འཚོ་གནས་ཀྱི་དམིགས་སྒོ་གོང་སྤེལ་ཐུབ་ཐབས་སུ་དགུན་ཚོང་གི་དོད་དུ་ཚོང་དང་ལས་རིགས་གཞན་གྱི་གོ་སྐབས་གཞན་བཙལ་རྒྱུ་དང་། ཚོང་ལས་དང་ལས་རིགས་གསར་པའི་ཐོག་སྦྱོང་བརྡར་གོ་སྒྲིག་བྱ་རྒྱུ།

2

༢། གཞི་ཆགས་སོ་སོར་ཚོང་ལས་འཛུགས་སྐྲུན་ཆུང་ཁག་རིགས་ལ་སྔར་མེད་གོ་སྐབས་གསར་སྐྲུན་བྱ་རྒྱུ། ཡང་ཁོང་ཚོར་ཚོང་ལས་རྒྱ་བསྐྱེད་ཐུབ་ཐབས་སུ་ཁྲོམ་རའི་ཉམས་ཞིབ་དང་། གནས་སྡོད་ཚོང་པ་གཞན་དང་ཚོང་འབྲེལ། ཁྲོམ་རའི་ཉམས་ཞིབ་ལ་མཁོ་བའི་འཕྲུལ་རིགས་རོགས་རམ། ཚོང་ལས་འཆར་འགོད། ཚོང་ལས་དེབ་སྐྱེལ་དང་དཔྱ་ཁྲལ་ཀྱི་ཁྲིམས་ལུགས། ཚོང་ལས་ལམ་སྟོན་སོགས་གང་ཅིར་རྒྱབ་སྐྱོར་ཞུ་རྒྱུ།

3

༣། ཁྲིམས་མཐུན་དེབ་སྐྱེལ་དང་ངོས་ལེན་ཡོད་པའི་ཚོང་ལས་སྒྲིག་འཛུགས་བརྒྱུད་ལས་མེད་བོད་རིགས་རྣམས་ལས་ཚོང་དང་། ལས་རིགས། བཟོ་རིག་སོགས་ཀྱི་ཐོག་དམིགས་བསལ་སྦྱོང་བརྡར་གྱི་གོ་སྐབས་བསྐྲུན་རྒྱུ།

4

༤། བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་སོ་ནམ་གཞི་ཆགས་ཁག་གི་ནང་སོ་ནམ་ཚོང་ལས་དེ་ཉིད་རྩལ་འདོན་གྱིས་རྒྱ་སྐྱེད་གོང་འཕེལ་གཏོང་ཐབས་བྱ་རྒྱུ། དེའི་བརྒྱུད་བཙན་བྱོལ་སྒྲིག་འཛུགས་ཀྱི་ངོས་ནས། ༡) སོ་ནམ་གྲངས་འབོར་ཉུང་དུ་འགྲོ་བཞིན་པ་དེ་ཚོར་ལོ་རེ་ཡོང་འབབ་གོང་མཐོར་གཏོང་རྒྱུ་དང་། ༢) རོགས་རམ་ལ་བརྟེན་ཞིང་རྒྱུན་གནས་མི་ཐུབ་པའི་སོ་ནམ་ལས་འཆར་ཁག་ཇེ་ཉུང་དུ་བཏང་རྒྱུ། ༣) གཞིས་ཆགས་ཁག་ཏུ་སོ་ནམ་པའི་ཡོང་འབབ་ལ་སྨན་པ་ཙམ་དུ་མ་ཟད་བཙན་བྱོལ་སྒྲིག་འཛུགས་ལ་ཡང་ཞབས་འདེགས་ཐུབ་པའི་སོ་ནམ་ཚོང་ལས་ཀྱི་ལས་འཆར་འཛུགས་རྒྱུ། ༤) ད་ཡོད་ས་ཆ་ས་ཟན་གྱི་ལག་ཏུ་མི་ཤོར་བ་བྱུ་རྒྱུ། ༥) སོ་ནམ་ཚོང་ལས་ལ་ཐུགས་སྣང་ལྡན་པའི་ན་གཞོན་རྣམས་ཀྱི་བློ་བསྐྱེད་སྤེལ་ཐབས་བྱ་རྒྱུ་བཅས་མི་རིང་བར་བསྒྲུབ་ཐུབ་པར་ངེས།

5

༥། སོ་ནམ་ཚོང་ལས་འཛུགས་སྐྲུན་ཀྱི་ལས་རིམ་ནི་གཞུང་སྒེར་འབྲེལ་ལམ་རིམ་པའི་རྣམ་གཞག་གི་སྒྲོིམ་གཞིའི་སྟེང་ནས་གཞིས་ཆགས་སོ་སོའི་ནང་སོ་ནམ་འདེབས་ལས་ཀྱི་ཚོགས་པ་ཞིག་དང་། བཙན་བྱོལ་བོད་མིའི་སྒྲིག་འཛུགས་འོག་སོ་ནམ་ཚོང་ལས་དང་འབྲེལ་བའི་རང་དབང་བདེན་པའི་ཚན་པ་ཞིག རྒྱ་གར་གྱི་ཁྲིམས་མཐུན་ཚོང་པའི་སྒྲིག་འཛུགས་བཅས་གསུམ་མཉམ་འབྲེལ་གྱིས་ཚོང་ལས་བྱེད་ན་དགེ་ཚན་ཆེ་བར་ངེས་པ་དང་། དེའི་བརྒྱུད་འབྲུ་རིགས་ཉོ་མཁན་དང་། ཁྲོམ་ར། འབྲུ་མཛོད་དང་དོ་ཁང་། ཚོང་འབྲེལ་དྲིལ་བསྒྲགས། ཚོང་རྟགས་དང་འགྲེམས་སྤེལ་བཅས་ཐུབ་རྒྱུར་ངེས་པས་དེ་དོན་བསྒྲུབ་ཐབས་འབད་རྩོལ་བྱ་རྒྱུ།

བཀའ་ཟུར་བློ་བཟང་སྙན་གྲགས་ལགས་ཀྱི་བུད་མེད་ནུས་སྟོབས་སྤེལ་བསྐྱེད་སྲིད་བྱུས་ཐོག་གི་ལས་འཆར་དང་གླེང་མོལ།

ཕྱི་ལོ་༢༠༢༠ ཟླ་བ་༡༠ ཚེས་༢༤ རེས་གཟའ་སྤེན་པ་ཉིན་བཀའ་ཟུར་བློ་བཟང་སྙན་གྲགས་ལགས་ནས་བུད་མེད་ལ་བརྙས་བཅོས་དང་ངན་བཀོལ་འགོག་ཐབས་དང་། ཕོ་མོ་འདྲ་མཉམ་གྱི་འདུ་ཤེས་སྐྱོང་ཐབས། མ་དང་བྱིས་པའི་གསོ་སྐྱོང་གི་གལ་གནད་བཅས་དོན་ཚན་གསུམ་དང་འབྲེལ་བའི་བུད་མེད་ནུས་སྟོབས་སྤེལ་བསྐྱེད་སྲིད་བྱུས་ཐོག་བཀའ་མོལ་གནང་བར་ཁོང་གི་གསུངས་དོན། 

1

བུད་མེད་སྲུང་སྐྱོང་། 

ང་སྲིད་སྐྱོང་དུ་འོས་འདེམས་བྱུང་ན་བཙན་བྱོལ་བོད་མིའི་སྒྲིག་འཛུགས་ནས་གཏན་ལ་ཕབ་པའི་ཚོགས་པ་དང་སྒྲིག་འཛུགས་ཆེ་ཕྲ་ཁག་གི་ནང་ཕོ་མོ་དབྱེ་འབྱེད་ཀྱིས་རྐྱེན་པའི་བརྙས་བཅོས་དང་། བཤུ་གཞོག ངན་བཀོལ། དྲག་སྤྱོད་སོགས་འགོག་ཐབས་ཀྱི་སྲིད་བྱུས་དགོངས་དོན་ཇི་བཞིན་བསྐྱང་རྒྱུ་ཡིན། བུད་མེད་ལ་དྲག་སྤྱོད་ངན་རྩུབ་ཀྱི་བྱ་སྤྱོད་འགོག་ཐབས་སུ་དམིགས་བསལ་ཚོགས་ཆུང་ཆེད་འཛུགས་བྱ་རྒྱུ་མ་ཟད། གཞི་ཆགས་དང་སློབ་གྲྭ་ཁག་ཏུ་བུད་མེད་ལ་དྲག་སྤྱོད་ངན་རྩུབ་ཀྱི་གནོད་འཚེ་མེད་པའི་རྒྱས་བཅད་ས་ཁུལ་དང་། དེ་བཞིན་དོ་དམ་ལས་བྱེད་བསྐོ་བཞག་བྱེད་འཆར་ཡོད། དེ་བཞིན་གཞི་ཆགས་དང་སློབ་གྲྭ་ཁག་ཏུ་བུད་མེད་དང་བུ་མོ་ཡོངས་ལ་སློབ་གསོ་དང་། སེམས་དང་ལུས་པོའི་དཀའ་ངལ། སྨན་བཅོལ་དང་འཚོ་ཐབས་ཀྱི་རོགས་རམ། ཁྲིམས་རྩོད་ཀྱི་མཐུན་སྦྱོར་ལམ་སྟོན། བཙན་བཀོལ་དྲག་སྤྱོད་ཕོགས་པ་རྣམས་ལ་ནད་སེལ་རོགས་རམ་སོགས་ཆ་གང་ཅིར་མཐུན་རྐྱེན་སྦྱར་རྒྱུའི་འཆར་གཞི་ཁ་གསལ་ཡོད། དེ་བཞིན་ཚོགས་ཆུང་གི་ཚོགས་གཙོར་བུད་མེད་བསྐོ་བཞག་བྱས་ཏེ་སྤྱི་ཚོགས་ནང་ཕོ་མོ་ཕན་ཚུན་གུས་བརྩི་དང་འདྲ་མཉམ་གྱི་འདུ་ཤེས་བསྐྱང་ཐབས་ཕྱོགས་ཡོངས་ནས་འབད་རྩོལ་གང་ཐུབ་བྱ་རྒྱུ་ཡིན། 

2

ཕོ་མོ་འདྲ་མཉམ་གྱི་འདུ་ཤེས་བསྐྱེད་ཐབས། 

ཕོ་མོ་དབྱེ་འབྱེད་ཀྱི་བསམ་སྤྱོད་ངན་པ་ཁག་གདོང་ལེན་དང་། ཕོ་མོ་འདྲ་མཉམ་གྱི་འདུ་ཤེས་བསྐྱེད་ཐབས་སུ་ཕོ་མོ་འདྲ་མཉམ་དང་འབྲེལ་བའི་ཁྲིམས་ལུགས་སྲིད་བྱུས་ཇི་ཡོད་ལག་བསྟར་དོ་ནན་བྱ་རྒྱུ་ཡིན། འདིའི་བརྒྱུད་ང་ཚོས་བུད་མེད་ཡོངས་ནས་གོ་སྐབས་མཉམ་ལེན་ཐུབ་པ་དང་། བུད་མེད་ཀྱི་འབོད་སྒྲ་ཕྱིར་བསྒྲགས་ཐུབ་པ། ལས་རིགས་སོགས་གང་སར་ཆ་ཤས་མཉམ་ལེན་ཐུབ་པ། བུད་མེད་དང་བུ་མོར་བཀོལ་བའི་ཉེས་སྤྱོད་ཁྲིམས་འགལ་གྱི་ལས་རྣམས་འགོག་ཐབས་ཐུབ་པ་བྱ་རྒྱུ་ཡིན། ངས་ལས་ཁུངས་སོགས་ལས་ཡུལ་ཁག་ཏུ་སྐྱེས་པ་དང་བུད་མེད་རྣམས་འདྲ་མཉམ་དང་། བུད་མེད་རྣམས་དབུ་ཁྲིད་ཀྱི་ལས་གནས་ཐོག་གནས་དོན་ཆེ་གྲས་ཐག་གཅོད་བྱས་ཏེ་སོ་སོའི་ལས་འགན་དང་མངོན་འདོད་ལོངས་སུ་སྤྱད་ཐུབ་རྒྱུར་རྒྱབ་སྐྱོར་གང་ཐུབ་ཞུ་རྒྱུ་ཡིན།

དེ་བཞིན་བུད་མེད་དང་འབྲེལ་བའི་དགོས་ཆོས་ངེས་འབྲེལ་གྱི་སྲིད་བྱུས་གཏན་འབེབས་ཀྱིས་དུས་བཀག་ལོ་ལྔའི་ནང་བཙན་བྱོལ་བོད་མིའི་སྒྲིག་འཛུགས་ལས་བྱེད་གསར་ཞུགས་ཁོངས་སུ་ཉུང་མཐར་བུད་མེད་ལས་བྱེད་བརྒྱ་ཆ་༣༠ དང་། བཀའ་བློན་བུད་མེད་གཉིས་ལས་མི་ཉུང་བ། བོད་མིའི་སྒྲིག་འཛུགས་ནང་དྲུང་ཆེ་དང་། དྲུང་འཕར། ཟུང་དྲུང་སོགས་དབང་འཛིན་གོ་དབང་འཛིན་པ་བརྒྱ་ཆ་༤༠ ལས་མི་ཉུང་བ་ཡོང་ཐབས་བྱ་རྒྱུ་ཡིན། ཁྱིམ་ཚང་འཆར་འགོད་དང་། བྱིས་པ་སྐྱེས་བཙས་ཀྱི་འཕྲོད་བསྟེན་སོགས་ཀྱི་ཐོག་གནས་ཚུལ་ཁྱབ་སྤེལ་དང་ཟབ་སྦྱོང་སོགས་གོ་སྒྲིག་གི་ལས་འཆར་ཉམས་མྱོང་ཡོད་པས་ལས་དོན་རྣམས་དོན་སྨིན་ལྡན་པ་བྱ་རྒྱུ་ཡིན།

ངས་ད་ཡོད་བུད་མེད་ནུས་སྟོབས་སྤེལ་བསྐྱེད་ཀྱི་ཚན་པ་དེ་ཉིད་བཙན་བྱོལ་བོད་མིའི་སྒྲིགས་འཛུག་ལྷན་ཁང་གི་སྡེ་ཚན་དུ་ངོས་འཛིན་བྱས་ཏེ་དེ་བུད་མེད་དང་སྐྱེས་ཕོ་མོའི་ལྷན་ཁང་ཞེས་པ་ལས་ཁུངས་མ་ལག་ཏུ་སློབ་གསོ་དང་། ཟབ་སྦྱོང་། མཐུན་རྐྱེན་སོགས་གང་ཐུབ་གོ་སྒྲིག་བྱ་རྒྱུ་ཡིན། 

3

མ་དང་བྱིས་པའི་གསོ་སྐྱོང་། 

ངས་མ་དང་བྱིས་པ་རྣམས་ལ་འཚོ་བ་དང་། འཕྲོད་བསྟེན། ཤེས་ཡོན་སོགས་གཞི་རིམ་གྱི་མཐུན་རྐྱེན་མཐའ་དག་སྦྱར་ཐུབ་པ་བྱ་རྒྱུ་ཡིན། ཕྱི་ལོ་༢༠༡༩ ལོའི་བཙན་བྱོལ་བོད་མིའི་མི་འབོར་གྲངས་རྩིས་གཞི་ལ་བཞག་སྟེ་གཞི་ཆགས་སོ་སོར་མ་དང་བྱིས་པ་རྣམས་ཁྱིམ་ཚང་གི་ལོ་རེའི་ཡོང་འབབ་གཞིར་བཟུང་ངོས་འཛིན་ཐུབ་རྒྱུ་དང་། དེ་འབྲེལ་ཁྱིམ་ཚང་སོ་སོའི་གནས་བབ་ལ་གཞིགས་ཏེ་བཙན་བྱོལ་བོད་མིའི་སྒྲིག་འཛུགས་ནས་མས་བསྐྱངས་པའི་ཁྱིམ་ཚང་དང་། གཟའ་ཟླ་མེད་པར་བུད་མེད་གཅིག་གིས་བསྐྱངས་པའི་ཁྱིམ་ཚང་ཁག་ལ་སློབ་གསོའི་མཐུན་རྐྱེན་སོགས་ཕུལ་རྒྱུ་ཡིན། དེ་བཞིན་ཡོང་འབབ་དམན་ཞིང་བུ་ཕྲུག་མང་བའི་མས་བསྐྱངས་པའི་ཁྱིམ་ཚང་དང་། གཟའ་ཟླ་མེད་པར་བུད་མེད་གཅིག་གི་བསྐྱངས་པའི་ཁྱིམ་ཚང་ཁག་ལ་སྤྱི་ཚོགས་བདེ་འཇག་གི་ལས་རིམ་ནང་དོན་བཞིན་དཔལ་འབྱོིར་དང་ཟས་རིགས་ཀྱི་རོགས་རམ་གང་མཁོ་བ་ཕུལ་ཐུབ་པ་བྱ་རྒྱུ་ཡིན། ཡང་སྤྱི་ཚོགས་ནང་ཚོང་ལས་སོགས་ལས་རིགས་ནང་ཞུགས་ནས་ཁྱིམ་ཚང་གི་འཚོ་རྟེན་སྦྱོར་བའི་བུད་མེད་རྣམས་ལ་དམིགས་བསལ་བུན་གཡར་དང་། ཚོང་ལས་ཆུང་རིགས་འཛུགས་སྐྲུན། ལས་རིགས་སྦྱོང་བརྡར། ས་གནས་སོ་སོར་བུ་བཅོལ་ཁང་དང་བྱིས་པའི་སློབ་གྲྭ་ཡར་རྒྱས་བཏང་སོགས་ཀྱི་མཐུན་སྦྱོར་ཞུ་རྒྱུ་ཡིན། དེ་བཞིན་ཕ་མར་ཕྲུག་གུ་གསོ་སྐྱོང་གི་སྦྱོང་བརྡར་དང་སློབ་གསོ་དང་། སྔོན་འགྲོ་དང་གཞི་རིམ་སློབ་གྲྭ་ཁག་འཛུགས་སྐྲུན་ཡར་རྒྱས་གང་ཐུབ་བཏང་བ་སོགས་ཕྱོགས་གང་ས་ནས་བཙན་བྱོལ་བོད་མིའི་ཤེས་ཡོན་སྲིད་བྱུས་ནང་དོན་བཞིན་བྱིས་པའི་ཤེས་ཡོན་དང་གསོ་སྐྱོང་ལ་དམིགས་བཀར་གྱིས་དོ་སྣང་བྱ་རྒྱུ་ཡིན།  

4

ཤེས་ཡོན་དང་འགོ་ཁྲིད་གསོ་སྐྱོང་། 

བུ་མོ་རྣམས་ལ་སློབ་གྲྭར་སློབ་སྦྱོང་བྱས་ཏེ་བསླབ་པ་ཐར་སོན་ཐུབ་པ་དང་། མཐོ་རིམ་སློབ་གྲྭར་སློབ་ཡོིན་གྱི་དཀའ་ངལ་སོགས་སེལ་ཐབས་སུ་བུ་མོར་ཆེད་དུ་དམིགས་པའི་སློབ་ཡོན་ལས་གཞི་ཁག་གསར་འཛུག་བྱ་རྒྱུ་ཡིན། དེ་བཞིན་ང་ཚོའི་སྤྱི་ཚོགས་ནང་བུད་མེད་ཀྱི་སྣེ་ཁྲིད་པའི་སྤྱི་མངས་བདེ་ཐབས་དང་བུད་མེད་ནུས་ཤུགས་སྤེལ་ཐབས་ཀྱི་ལས་རིམ་ཁག་དཔེར་ན་འགོ་ཁྲིད་གསོ་སྐྱོང་དང་། བུད་མེད་དང་ཁྱིམ་ཚང་གི་འཕྲོད་བསྟེན། ཕོ་མོའི་ཐད་ཀྱི་གོ་རྟོགས་བསམ་ཤེས་ཡར་རྒྱས་སོགས་ལ་དམིགས་པའི་གཞུང་འབྲེལ་མིན་པའི་ཚོགས་པ་ཁག་ཅིག་ཡོད་པས་དེ་དག་ལ་དམིགས་བསལ་གྱི་མཐུན་འགྱུར་རོགས་རམ་གང་ཐུབ་བྱ་རྒྱུའི་ཆོད་སེམས་བརྟན་པོ་ཡོད།

བཀའ་ཟུར་བློ་བཟང་སྙན་གྲགས་ལགས་ཀྱི་འཕྲོད་བསྟེན་ཐོག་འཛིན་པའི་སྲིད་བྱུས་གནས་དོན་གལ་གནད་ཆེ་བ་རྣམས་གཤམ་གསལ་ལྟར་ཡིན།

1

༡། བཙན་བྱོལ་བོད་མིའི་སྤྱི་ཚོགས་ཁྲོད་དུ་གཅིན་སྙི་དང་ཁྲག་ཤེད་སོགས་རྒྱུན་ལྡན་ཟས་སྤྱོད་དང་འབྲེལ་བའི་འགོ་ནད་མ་ཡིན་པའི་ནད་གཞི་རིགས་ཇེ་མང་དུ་འགྲོ་བཞིན་པའི་དཀའ་ངལ་ནི་དངོས་བདེན་ཡིན་ཞིང་ནད་གཞི་འདི་རིགས་སྔོན་འགོག་ཐུབ་པར་དམིགས་བསལ་དོ་སྣང་བྱ་རྒྱུ། ནད་གཞི་འདི་རིགས་ཕལ་ཆེ་བ་ཟས་དང་རྒྱུན་ལྡན་འགྲོ་འདུག་གི་སྤྱོད་ལམ་ལ་རག་ལས་པས་སྨན་དཔྱད་བསྟེན་གཏུག་ཙམ་དུ་མ་ཟད། ལུས་སྦྱོང་དང་། ཟས་སྤྱོད་ཀྱི་ནད་འགོག་ཀྱི་ཆ་ཤས་ཁག་ལའང་དོ་སྣང་དམིགས་བསལ་བྱ་རྒྱུ།

2

༢། ང་ཚོའི་སྤྱི་ཚོགས་ནང་འགོ་ནད་ཁྱབ་ཆེ་བ་ནི་གློ་ནད་ཊི་སྦི་དང་། མཆིན་ནད་ཧེ་པ་ཊེ་ཊི་སི་གཉིས་ཡིན་པས། ནད་རིགས་འདི་དག་
༡) འཕྲོད་བསྟེན་གོ་རྟོགས་དང་།
༢) སྔོན་འགོག་སྨན་ཁབ།
༣) ནུས་ལྡན་སྨན་བཅོལ་བཅས་གསུམ་གྱི་བརྒྱུད་གྲངས་འབོར་ཇེ་ཉུན་དུ་བཏང་རྒྱུ། དམིགས་བསལ་བུད་མེད་དང་། མངལ་ཁྱེར་སྦྲུམ་མ། དེ་བཞིན་བྱིས་པ་གསར་སྐྱེས་རྣམས་ལ་བརྟག་དཔྱད་དང་སྔོན་འགོག་སྨན་ཁབ་བརྒྱུད་བུད་མེད་དང་མ་དང་བྱིས་པའི་འཕྲོད་བསྟེན་བརྒྱུད་སྤྱི་ཚོགས་བདེ་ཐབས་ལ་འབད་རྩོལ་བྱ་རྒྱུ།

3

༣། ལྷོ་ཨེ་ཤི་ཡའི་ས་ཁུལ་ནང་བཙན་བྱོལ་བོད་མིའི་སྒྲིག་འཛུགས་ཀྱིས་འཕྲོད་བསྟེན་ཁྱབ་ཁོངས་ཀྱི་སྨན་ཁང་མ་ལག་ཁག་ཏུ་བོད་མི་རྣམས་གླ་མེད་ཐོག་ལོ་རེའི་ལུས་པོ་བརྟག་དཔྱད་ཀྱི་གོ་སྒྲིག་ཞུ་རྒྱུ་ཡིན།

4

༤། བོད་མི་འདྲེས་སོང་རྣམས་ཀྱི་འཕྲོད་བསྟེན་ཡར་རྒྱས་བཏང་ཐབས་སུ་རྒས་གསོ་ཁང་གི་ཕྱི་ནང་མཐུན་རྐྱེན་ཡར་རྒྱས་བཏང་རྒྱུ་དང་། སྨན་ཞབས་དང་སྨན་གྲོགས་རྣམས་ལ་འདྲེས་སོང་བལྟ་སྐྱོང་གི་ཟབ་སྦྱོང་ཕུལ་ཏེ་འདྲེས་སོང་ཞབས་ཞུ་མི་དམན་པ་འབུལ་རྒྱུ།

5

༥། མ་དང་བྱིས་པ་རྣམས་ལ་འཕྲོད་བསྟེན་མཐུན་རྐྱེན་གང་ཡོད་འབུལ་ཐབས་བྱ་རྒྱུ། དེའི་ཁོངས་དམིགས་བསལ་གྱིས་སྦྲུམ་མའི་གནས་སྐབས་ཀྱི་མ་དང་བྱིས་པའི་འཕྲོད་བསྟེན་དང་། ས་གནས་སོ་སོར་བྱིས་པའི་སྨན་པའི་དྲུང་ནས་དམིགས་བསལ་སྨན་དཔྱད་བསྟེན་གཏུག། བུད་མེད་རྣམས་ལ་བུད་མེད་ནད་སེལ་ལ་མཁས་པའི་སྨན་པའི་དྲུང་ནས་དམིགས་བསལ་སྨན་དཔྱད་བསྟེན་གཏུག འཕྲོད་བསྟེན་ཁྱབ་ཁོངས་ཀྱི་སྨན་ཁང་ནས་མ་དང་བྱིས་པའི་སྡོད་གནས་སོ་སོར་སྨན་སྐོར་སོགས་ཀྱི་མཐུན་རྐྱེན་སྦྱར་རྒྱུ།

6

༦། ད་ཡོད་བཙན་བྱོལ་བོད་མོའི་སྨན་དཔྱད་ཉེན་སྲུང་གི་ལས་རིམ་མུ་མཐུད་རྒྱུན་སྐྱོང་ཡར་རྒྱས་གང་ཐུབ་བྱ་རྒྱུ།

7

༧། བོོད་མིའི་གཞི་ཆགས་དང་འདུས་སྡེ་ཁག་ཏུ་བཙུགས་པའི་བཙན་བྱོལ་བོད་མིའི་འཕྲོད་བསྟེན་ཁྱབ་ཁོངས་མིན་པའི་སྨན་ཁང་ཁག་དང་འབྲེལ་ལམ་དམ་ཟབ་བཞག་རྒྱུ་ཡིན།

8

༨། རང་རེའི་བོད་ལུགས་སྨན་དཔྱད་དང་། ཕྱི་ལུགས་སྨན་དཔྱད་ཀྱི་ལུགས་ཁྱད་པར་བ་གཉིས་ཀྱི་བརྒྱུད་བོད་མི་ཡོངས་ཀྱི་འཕྲོད་བསྟེན་ཡར་རྒྱས་གོང་འཕེལ་གྱིས་བོད་མིའི་སྤྱི་ཚོགས་བདེ་འཇགས་ཡོང་ཐབས་བྱ་རྒྱུ།